En blers lieus protegian ils guauds da protecziun zonas d'abitadi e d'industria sco er vias da traffic ed auters indrizs d'infrastructura ch'èn situads pli bass cunter lavinas, cunter crudada da crappa sco er cunter bovas. Perquai che las plantas creschan mo plaun, po l'effect dal guaud da protecziun dentant vegnir stabilì mo a vista mesauna fin a lunga vista. Il mantegniment ed uschia er la tgira dal guaud da protecziun èn perquai incumbensas che ston vegnir ademplidas en moda persistenta. Perquai ch'il guaud da protecziun ha in effect per grondas surfatschas, è – ultra da sforzs punctuals en singuls lieus – in engaschi cuntinuà cun intervenziuns extensivas en l'entir guaud da protecziun d'ina impurtanza centrala en quest connex.

L'onn 1995 han intginas persunas ch'eran responsablas per il guaud fundà la gruppa da lavur cun il num "lavur da publicitad en connex cun privels dal guaud e da la natira" per render attent la politica e la societad a la necessitad da mantegnair e da tgirar il guaud da protecziun. Da questa gruppa da lavur è resultada la gruppa da lavur "guaud da protecziun svizzer". Ensemen cun l'institut per marketing e per commerzi da l'universitad da Son Gagl è vegnì elavurà in concept per la lavur da publicitad davart il tema "guaud da protecziun". La realisaziun è vegnida surdada al post spezialisà per la selvicultura da muntogna. L'uffizi federal d'ambient e la conferenza da las inspecturas e dals inspecturs forestals chantunals sustegnan questas stentas..